Eurovisionkeppnin árið 1983 var haldin í Rudi-Sedlmayer-Halle í München þann 23. apríl eða fyrir nákvæmlega 40 árum síðan í dag. Kynnir var Marlene Charell. Tuttugu lönd tóku þátt. Tyrkir fengu núll stig í fyrsta sinn þegar Çetin Alp flutti lagið Opera. Þessi keppni varð afar vinsæl og áhorf mikið. Það var til dæmis talið að annar hver Breti hefði horft á hana.
Tæknin og tækniframfarir spiluðu stórt hlutverk í þessari keppni. Í fyrsta skipti í sögu keppninnar sáust þráðlausir hljóðnemar og það strax í fyrsta lagi sem var frá Frakklandi, Vivre með Guy Bonnet. Þetta var auðvitað mikil bylting og bauð upp á líflegri sviðsframkomu og meiri dans sem varð heldur betur raunin næstu árin. Einnig var komið á gevihnattasambandi við Ísland og keppnin var sýnd í beinni útsendingu hér á landi í fyrsta skipti. Áður hafði keppnin yfirleitt verið sýnd næsta laugardag á eftir og hafði það verið þannig frá árinu 1967, en íslenska Ríkissjónvarpið fór fyrst í loftið haustið 1966. Í framhaldinu fóru að heyrast raddir um þátttöku okkar Íslendinga í keppninni. Keppnin var einnig sýnd í beinni útsendingu í Ástralíu í fyrsta skipti og hafa Ástralir margir hverjir haldið uppá keppnina síðan, þótt hún sé sýnd á undarlegum tíma í sólarhringnum þar. Þeir höfðu þá líka þá þegar sent landa sína í keppnina, eins og Johnny Logan og Oliviu Newton John. Það var hins vegar ekki fyrr en 32 árum síðar sem Ástralir fóru sjálfir að vera með.
Í þriðja sæti í Eurovision 1983 varð Carola Häggkvist með lagið Främling eða Ókunnur. Lagið er eftir Lasse Holm og textinn er eftir Monicu Forsberg. Lasse hefur samið fleiri sænsk Eurovisionlög, Dag efter dag 1982, Bra vibrationer 1985, Eloise 1993 og E’ de’ det här du kallar kärlek árið 1986. Það flutti hann sjálfur ásamt Moricu Törnell. Främling var gefið út af sænsku rokkgrúppunni Black Ingvars árið 1998 með Led Zeppelin ívafi og er þetta ekki eina Eurovisonlagið sem sú sveit hefur tekið upp á sína arma. Einnig hefur lagið verið gefið út í norskri og finnskri útgáfu. Carola var tæplega 17 ára gömul þegar hún flutti lagið Främling. Hún tók aftur þátt í Eurovison átta árum síðar, árið 1991 þegar hún flutti lagið Fangad af en stormvind og sigraði. Hún tók síðan þátt í þriðja sinn árið 2006 þegar hún flutti lagið Invincible og varð í fimmta sæti. Afar farsæll Júróferill semsagt. Hún hefur komið að Eurovision eftir þetta í nokkrum minni hlutverkum, meðal annars sem stigakynnir.
Ísraelar urðu í öðru sæti eins og árið áður. Núna var það Ofra Haza með lagið Hi. Lagið er eftir Avi Toledano og Ehud Manor. Í atriðinu var mikill, samhæfður dans og gott dæmi um að þráðlausu hljóðnemarnir hjálpuðu til við að gera atriðið glæsilegt. Ári síðar gaf Ofra út plötuna Shirei Teiman og varð hún mjög vinsæl víða um heim. Tónlist Ofru þótti vera skemmtileg blanda af tónlist frá miðausturlöndum og vestrænni popptónlist. Ofra var afar vinsæl næstu ár og gaf út nokkrar plötur, þá síðustu árið 1997. Hún gaf einnig út lög í samstarfi við þekkta en afar ólíka tónlistarmenn, eins og Paulu Abdul, Söruh Brightman og Iggy Pop. Ofra lést úr alnæmi árið 2000, aðeins 42 ára gömul.
Sigurlag keppninnar var frá Lúxemborg. Hin franska Corrine Hermés, fædd Bondeaux, flutti lagið Si la vie est cadeau eða Ef lífið væri gjöf. Það er eftir Jean-Pierre Millers og Alain Garcia. Lúxemborg var að vinna Eurovisionkeppnina í fimmta sinn þarna og ná Frökkum sem höfðu á þessum tíma líka unnið fimm sinnum, síðast 1977. Hvorug þjóðin hefur hins vegar unnið síðan. Lagið náði ekki miklum vinsældum í Evrópu í samanburði við sigurlög frá svipuðum tíma og þykir yfirleitt ekki mjög eftirminnilegt. Corrine hefur starfað sem söngkona frá árinu 1974. Hún var í alþjóðlegri dómnefnd sem valdi framlag Eista til Eurovision keppninnar árið 2000 og hún var stigakynnir Frakklands árið 2001. Lúxemborg tók síðast þátt í Eurovision fyrir 30 árum eða árið 1993 og Eurovision aðdáendur bíða og vona eftir endurkomunni á hverju ári.