Tere päevast góðir lesendur. Vinir okkar í Eistlandi hafa nú gert upp hug sinn og í gærkvöldi var arftaki Stefan krýndur við hátíðlega athöfn í Tondiraba íshöllinni í Tallinn þar sem 12 atriði kepptu til sigurs í Eesti Laul. Það var söngkonan Alika sem að hrifsaði til sín sigurinn nokkuð örugglega eftir að hafa siglt inn í súperfínalinn ásamt tveimur rokklögum og mun hún freista þess að toppa 13. sæti Stefans frá því fyrra.
20 lög byrjuðu leika en eftir tvær undankeppnir, þann 12. og 14. janúar síðastliðinn, fækkaði þeim niður í 10 og svo var einn Svarti Pétur úr sitthvorum riðlinum og þ.a.l. kepptu 12 lög til úrslita í Tallinn í gærkvöldi. Glöggir júróaðdáendur ráku reyndar augun í altrokkindí-krúttið Robin Juhkental, forsprakka sveitarinnar Malcolm Lincoln sem keppti í Osló 2010, en kappinn var mættur sóló með lagið “Kurbuse matused” í fyrri undanriðlinum en hafði því miður ekki erindi sem erfiði. Ansans.
En að eistneskum vanda var mikið um dýrðir í Tondiraba höllinni í gær og boðið upp á brjálæðislega flott show, svo maður sletti nú aðeins. Það voru mikið til ný andlit (á júró-mælikvarða) sem sáust á sviðinu en þó var hún Sissi mætt aftur. Ef þið munið ekki eftir henni, þá var hún næstum því búin að taka farmiðann til Rotterdam af Uku Suviste í hittifyrra, en í þetta sinn varð hún að láta sér lynda 6. sætið.
Eins og venjulega samanstóð stigagjöfin af helmingsvægi dómnefndar á móti helmingsvægi almennings. Eftir að dómnefndastigin höfðu verið talin var ljóst að það voru grímuklæddu rokkflippararnir í Bedwetters og lagið “Monster”, emóspaðinn Ollie og lagið hans “Venom” og svo auðvitað hún Alika með “Brigdes”, sem skyldu áfram í súperfínalinn svokallaða, en þá tók hrein símakosning við. Þar vann Alika nokkuð afgerandi sigur með 42% atkvæða á meðan Ollie var öruggur með annað sætið og 33% atkvæða. Bedwetters vermdu svo 3. sætið og voru hinir rólegustu að spæla sér egg í græna herberginu og ekkert að kippa sér upp við havaríið í kringum sig. Grallaraspóar.
Alika sjálf er tvítug og fædd og uppalin í bænum Narva í Eistlandi, en er komin af rússneskum foreldrum og móðurmál hennar er rússneska. Hún er búin að feta sömu braut og margir aðrir ungir söngvarar þessa dagana, þ.e. tekið þátt í ýmiskonar hæfileikakeppnum og vakið verðskuldaða athygli í þeim öllum, því stelpan getur svo sannarlega sungið. Hún stimplaði sig endanlega inn í eistnesku þjóðarsálina þegar hún vann hæfileikakeppnina Eesti Otsib Superstaari árið 2021 og landaði í kjölfarið plötusamning við Universal Records. Lagið “Bridges” semur hún sjálf ásamt lagahöfundunum Wouter Hardy, sem m.a. hefur starfað með Duncan Laurence og Gjon´s Tears og Ninu Sampermans sem hefur t.a.m. unnið með Hooverphonics. Svo Alika er svo sannarlega umkringd júróvönu fólki á alla kanta, sem mun eflaust koma sér vel þegar hún stígur á svið í Liverpool þann 11.maí nk., sama kvöld og við Íslendingar.