Bilal fulltrúi Frakklands í Eurovision 2019

Eftir æsispennandi stigagjöf í undankeppninni Destination Eurovision í Frakklandi í gær var það ljóst að samfélagsmiðlastjarnan Bilal Hassani hafði unnið miðann til Tel Aviv. Það kom kannski ekki á óvart – enda var hann hæstur í veðbönkum fyrir keppnina og í efsta sæti hjá mörgum aðdáendum.

Alþjóðleg dómnefnd skipuð tíu dómurum hafði helmings ákvörðunarvald á móti símakosningu. Eftir að dómnefndastigin höfðu verið tekin saman var Seemone í fyrsta sæti með 94 stig, Silvàn Areg í öðru sæti með 76 stig og Emmanuel Moire með 64 stig í þriðja sæti. Það kom nokkuð á óvart að Bilal var í fimmta sæti með 50 stig hjá alþjóðlegu dómnefndunum. Það var tilfinningaþrungin stund þegar Garou kynnir kvöldsins las upp atkvæðin úr símakosningunni þar sem Bilal vann yfirburðasigur með um 35% atkvæða. Chimène var í öðru sæti hjá almenningi og Seemone í þriðja sæti með um 15% atkvæða úr símakosninu.

Hér að neðan er lokaniðurstaðan í Destination Eurovision. Með því að smella á hlekkina í töflunni getið séð atriðin úr keppninni.

Það kemur í hlut hins unga Bilals að feta í fótspor dúettsins Madame Monsieur sem voru fulltrúar Frakklands í fyrra. Það vill einmitt svo skemmtilega til að Madame Monsieur sömdu lagið með Bilal svo þau hafa örugglega góð ráð fyrir hann hvernig eigi að vinna hug og hjörtu Eurovision aðdáenda.