Lagið Nótt eða Tonight á ensku sem keppir í Söngvakeppninni á laugardag er eftir Svein Rúnar Sigurðsson og FÁSES-liða til margra ára. Sveinn Rúnar er búin að eiga svona sirkabát eina milljón eitt þúsund og fimmtíu lög í Söngvakeppninni en er örugglega frægastur fyrir Heaven með Jónsa sem var Eurovision framlag Íslendinga 2004, Valentine Lost með Eiríki Hauks sem keppti í Helsinki 2007 og að sjálfsögðu Hugarró með Magna sem keppti í Söngvakeppninni 2012. Í ár er aldeilis slegið í klárinn og hefur Sveinn fengið til liðs við sig öflugt teymi til að gera atriðið sem best úr garði eins og t.d. Heru Björk, Valgeir Magnússon, Örlyg Smára og StopWaitGo. Sveinn hefur verið með annan fótinn í Úkraínu síðustu ár, rekur fyrirtæki í Kænugarði og er giftur henni Maríu sem er úkraínsk. Það væri því eflaust sætt að geta tekið þátt í Eurovision svona hálfpartinn á heimagrundu. Til þess arna hefur Sveinn veðjað á tiltölulega óþekktan klár; Aron Hannes Emilsson, sem hefur nýlokið akademíu námi Complete Vocal Institute í Kaupmannahöfn.
Við tókum hús á Aroni Hannesi og Næturgenginu (sem geymir m.a. vel valinn FÁSES-liða i bakröddum, Eirík Þór Hafdal) við æfingu í World Class Laugum. FÁSES.is lék m.a. forvitni á að vita hver þessi efnilegi söngvari væri og hvort það væri pressa á kappanum að vera spáð velgengni verandi með svona öfluga bakhjarla. Við komumst einnig að því að Aron verður með dansara á sviðinu og notast sviðsetningin við áhorfendur þegar kappinn snýr sér við á sviðinu (halló vasaljós!). Auðvitað tók Aron síðan lagið sitt fyrir okkur – hann spilar meira að segja á gítar!
Á meðan fréttaritarar FÁSES fylgdust með dansæfingum var ljóst að betri helmingur þess teymis réð sér ekki fyrir kæti enda dansáhugamaður mikill. Því var smellt í létt sprell og Flosi fenginn til að spreyta sig sem einn af dönsurunum hans Arons!
Fyrir þá sem fengu ekki nóg af bakraddardansinum hans Flosa hér í fyrra videoi geta séð það í fullri lengd hér: